Forsíða
Um
mig
Þátttaka
í endurvakningu
Nýjustu fréttir
Forntextaskriftir
Kennsluefni
Námskeið & Vinnubúðir
Atriðaorðaskrá
Tenglar
Myndasafn
I Forntextaverk
II Nútímaleg
verk
III Sögulegt
handverk
IV Miniaturar
Sölustaðir
Verslanir
Markaðir
& Sýningar
Sögulegt
handverk
Örnámskeið (væntanleg)
Handverk barna
Senda
tölvupóst
English
(due soon)
Please e-mail if you have
some questions.
|
Þátttaka
í endurvakningu miðaldahátta
Hér
á landi er fjöldi einstaklinga sem hefur áhuga á að endurvekja ýmsa
hætti miðalda - sjálfum sér og öðrum til skemmtunar.
Sumir
vinna einir, aðrir í hópum, flestum lítt skipulögðum. Til eru hópar sem
sérhæfa sig í bardagaíþróttum og aðrir sem sérhæfa sig í söng og
leik, og loks eru sprotar af nokkrum hópum handverksaðila hér og þar um
landið.
Flestir
endurvekjendur eru einungis sýnilegir almenningi yfir sumartímann, sumir
eina og eina helgi, aðrir eru virkari og láta sjá sig oftar.
Fáeinir
endurvekjendur fást til að halda erindi um "sínar ær og kýr",
aðrir láta sér duga að sýsla einir við sitt og hægja þannig á
tímanum um stund.
SKE - hópurinn
Ég
er í handverkshópnum SKE
(Svanhvít-Elfa-Kristín), en hann hóf starfsemi haustið 2006 og hefur
síðan þá verið duglegur að hittast á mánudagskvöldum og vinna í
handverki af ýmsu tagi.
Við lærum saman, kennum hver annarri og höfum virkilega gaman
af bæði handverki og öðru sem er á dagskrá hverju sinni. Auk handverks höfum
við lært að ákalla höfuðöflin og kynnst heitsteinanuddi.
>>>
Meira um vinnu SKE hópsins
|
Miðaldahátíðir
Ég hef sótt talsvert í þátttöku á miðaldahátíðum og hef frá
upphafi leitast við að koma mér upp leikmynd til að gefa gestum og gangandi
innsýn í vinnuaðstöðu skrifara og lýsara á miðöldum.
Mér tókst að smita Elfu og Svanhvíti af bakteríunni og þær hafa tekið
þátt í miðaldahátíðum með mér nokkrum sinnum.
Leifshátíð í
Dölunum
Dalamenn hafa haldið fjölskylduhátíð undanfarin ár og reynt að gera
hana að eins konar miðaldahátíð. Hún er því miður ekki
svipur hjá sjón nú orðið miðað við það sem hún var fyrir nokkrum
árum þegar góður og lifandi markaður var settur upp, þátttakendur
sýndu vinnulag og fleira áhugavert. Mig minnir að þetta hafi verið
2002. Síðan hefur ekki mikið gerst til batnaðar.
Ég tók þátt 2005 ásamt Svanhvíti og Steinunni Eiríksdóttur, frábærri
tréútskurðarkonu úr Borgarfirði, tengdamóður Elfu. Með okkur voru
líka dóttir Elfu, Katrín og frænkur hennar Stella Dögg og Drífa. Elfa var fjarri góðu
gamni, upptekin við annan starfa.
Veðurguðirnir
voru okkur ekki hliðhollir það árið og hallærislega nútíma-partý-tjaldið okkar tókst á loft
í einni vindhviðunni sem gekk yfir. Grindin bókstaflega krullaðist saman
(engar ýkjur) þegar þessi nýrstárlegi flugdreki lenti fremur ótígulega á
jörðinni. Þáverandi sveitarstjóri bauð okkur að setja upp bás í veitingatjaldi
Dalamanna og tókum við því boði fegins hendi.
Á Leifshátíð sumarið 2006 tókum við enga sjensa með veður og fengum að
vera aftur í veitinga- og samkomutjaldi Dalamanna, ásamt öðru góðu fólki.
Miðaldadagar
að Gásum við Eyjafjörð
Gásir eru einn elsti þekkti verslunarstaður á Íslandi. Þar hafa verið
margviðraðar hugmyndir um uppbyggingu. Fáein síðustu ár hafa þar þó
aðeins verið haldnir svo kallaðir miðaldadagar, sem Gásahópurinn,
handverksfólk úr firðinum og nágrenni, hefur í raun gert mögulega.
Sumarið 2005 fór ég að Gásum til að vera með á miðaldadegi. Ég hafði kíkt sem gestur
2004 og var spennt fyrir því að taka þátt í að skapa þar meira
líf, eins og mér skildist að væru uppi hugmyndir um að gera.
Hlýjar
og vinalega móttökur Gásahóps eru mér eiginlega hvað minnisstæðastar frá
þessum degi. Meðferðis hafði ég fyrirferðarmikla leikmynd mína og fékk dygga aðstoð frá öðrum
endurvekjendum við að koma henni á tjaldsvæðið þar sem mín beið
tilbúið tjald undir dótið mitt.
Gestirnir sem komu í tjaldið voru frábærir, mjög áhugasamir um
sögu og muni handverksins sem ég var að sýna. Ég man ekki eftir öðrum
eins áhuga gesta á básnum mínum hérlendis.
Ég sá
mér því miður ekki fært að vera með árið 2006,
en kíkti sem gestur stutta stund og varð fyrir vonbrigðum að
sjá að hinar góðu hugmyndir sem höfðu verið uppi árið áður voru að
mestu horfnar. Í staðinn hafði verið keyptur inn danskur hópur með
furðulega fallbyssu (!) og plasthálsfestar.
Raunar skilst mér að enn sé ekki öll von úti enn. Minjasafnið á
Akureyri, sem hefur veg og vanda að uppbyggingu að Gásum, hefur fengið
góða styrki og stefnan er að byggja eins konar tilgátuþorp á staðnum.
Gásahópurinn, fólkið sem raunverulega sér um að skapa lífið, klæði
og muni fyrir staðinn, hlýtur þá að fara að fá laun fyrir sína vinnu.
|
Sólstöðuhátíðin
í Hafnarfirði
Jóhannes í Fjörukránni í
Hafnarfirði hefur í áraraðir haldið hátíð þar út frá tíma
víkinga. Ég fór ekki í ár, en í fyrra kíkti ég sem gestur. Þar mátti
þá berja augum massa af erlendum “víkingum” og “valkyrjum”, bæði
innan bardagavallar og á handverkssvæði. Mjög fáir íslenskir
handverksaðilar voru á staðnum. Sorglegt.
Ég tók þátt í hátíðinni
2003, við sterkan vind af sjónum og mikinn kulda. Elfa kom með sem
þrællinn minn og mamma m.a.s. leysti hana af einn daginn. Ég náði að
skoða allt svæðið og fannst svo skemmtilegt að taka þátt að mér var
nokkuð sama þótt ég hefði ekki náð að selja til að hafa fyrir
kostnaði. Við Elfa vorum báðar veikar í viku á eftir, enda skykkjulausar
og kaldar mestalla hátíðina.
Árið 2004 ætlaði ég að vera
með aftur og bæta um betur á básnum mínum, bæði með fólki, leikmynd
og vöruúrvali. Markmiðið var að skapa meira líf og koma með fleira
fólk inn í myndina.
Þegar liðið mitt mætti á staðinn var hins vegar ekki fúin spýta eftir
í bás undir herlegheitin – einhver misskilningur í gangi þar. Ég
reiddist auðvitað, en var þá bara gerð útlæg úr þessu litla
konungsríki - og það með skít og skömm. Ferlega svekkjandi, mest þó
barnanna vegna. Ég hafði lofað að þau fengju að vera með þetta árið
og höfðu þau fengið búninga af því tilefni. Ég varð því að brjóta
odd af oflæti mínu og stelast með þau inn á svæðið svo þau sæju
síður hve illa Kristínu frænku leið í raun og veru. Um leið bar ég
smurt brauð og kaffi til hinna sem ég hafði jú platað út í þetta “með
mér”.
Börnin hafa sem betur fer síðan
fengið að viðra flottu búningana sína á Leifshátíð og eitt þeirra
með mér á Hrafnagili. Dásamlegt að sjá hve börn eru fljót að
fyrirgefa.
European
Medieval Festival
Fyrsta
miðaldahátíðin sem ég tók þátt í var hin árlega evrópska miðaldahátíð í
Horsens, Danmörku, sumarið 2002. Fólk kemur
þangað víða að úr Evrópu, bæði þátttakendur og gestir.
Elísabet vinkona mín kom frá
Noregi til að hjálpa mér á básnum – sem betur fer því brjálað var
að gera. Ditta, systurdóttir mín sem er búsett í Horsens, aðstoðaði
líka öðru hvoru, en samt hrukku kraftar okkar ekki til er á reyndi. Þetta
var alvöru hátíð; um 20 þúsund gestir komu á hátíðarsvæðið það
árið.
Íslenskir gestir komu víða að og skrifuðu flestir í
bókfells-gestabókina mína. Danir voru hreinlega brjálaðir í bókina, en
of mikið var að gera á básnum við sögumiðlun, áhalda- og
efnissýningar, svo og auðvitað tilraunir til sölu á forntextaverkunum
mínum, fyrir aðeins tvær og hálfa manneskju til að hægt væri að sinna
líka kennslu á fjaðrapenna og skrifum í gestabók. Hún var því tekin
úr augsýn, en dregin fram fyrir Íslendinga og stöku áhugamann um handrit
og skriftir.
Það
rigndi rosalega helgina sem hátíðin stóð yfir. Aðrir skrifarar sem höfðu
lofað þátttöku í hátíðinni létu ekki sjá sig, en við
Íslendingarnir létum veðrið ekki aftra
okkur og stóðum okkar plikt.
Vegna anna sáum við Elísabet
ekki nema sáralítið brot af hátíðarsvæðinu og bara þeim hluta sem var
næst okkar bás þegar við skutumst eftir myrkur í endurvarpi logandi
kyndla yfir polla og aur til að kaupa mat og drykki eða á ljóslausa
kamrana. Ditta tók myndirnar “þarna úti” sem hér sjást. Við
Elísabet urðum að láta okkur nægja upplifun af tónlist og söng, hrópum
og köllum, og furðulegum lyktum héðan og þaðan af hátíðarsvæðinu.
Ég fékk boð um að vera aftur
með 2003 en varð því miður að afþakka. Það er allt of mikið fyrir
eina manneskju að standa undir kostnaði.
Ráð
og ábendingar
Ég
ráðlegg þeim sem ætla að taka þátt í hátíðum erlendis að
fara nokkrir saman. Þá er bæði hægt að dreifa kostnaði og fara frá
bási sínum til að skoða svæðið á meðan aðrir líta eftir munum ykkar.
Eftir á að hyggja finnst mér ferlega súrt í broti að hafa ekki haft
tækifæri til að ganga um svæði og skoða og læra af öðrum
endurvekjendum.
Hér
á landi er bráð-nauðsynlegt að eiga tjald og búnað í það, a.m.k.
borð og stóla, enda ekki hægt að stóla á að hátíðarhaldarar skaffi
þannig hluti.
Mér
finnst stórmerkilegt að þeir sem skipuleggja og halda hátíðir af þessu
tagi hér á landi skuli ætlast til þess að einstakir þátttakendur leggi
bæði til tjaldbúðir og ólaunaða vinnu við að skemmta gestum
þeirra.
Engum
hátíðarhaldara dettur í hug að bjóða handverksaðilum upp á laun eða
prósentur af aðgangseyri - en þó erum við lífið á staðnum, fólkið
sem miðlar sögunni og sýnir vinnubrögð og muni. Án okkar væri hátíð
ekki upp á marga fiska.
Tja,
auðvitað er hægt að halda áfram að kaupa til landsins erlenda
skemmtikrafta í bardaga-at, leik og söng, en hver verður þá framtíð
þessarar tegundar af skemmtun hér á landi...?
Finnst
Íslendingum þeir ekki eiga nógu spennandi sögu sjálfir til að
"selja"?
SSF
– Samtök um sögutengda ferðaþjónustu
Í fyrra
(2006) voru stofnuð Samtök um sögutengda
ferðaþjónustu (SSF), en helsti tilgangur þeirra er...:
…að vera samvinnu- og samráðsvettvangur þeirra er stunda sögutengda
ferðaþjónustu á Íslandi. Auk þess er markmiðið að auka samvinnu í
kynningarmálum, gæðamálum og stuðla að aukinni fagmennsku. Samtökin
leggja í fyrstu áherslu á arfleifð íslenskra miðaldabókmennta, fyrstu
aldir Íslandsbyggðar og miðaldamenningu, þ.e. tímabilið frá landnámi
og fram um 1300...
Ég hef ekki gengið í samtökin,
sem mér skilst að séu fremur fyrir fyrirtæki og stofnanir heldur en
einstaklinga í endurvakningunni sjálfri. Ég hef þó fylgst með úr
fjarlægð, spennt að sjá hvað verður úr hinum merkilegu hugmyndum sem
eru uppi.
Meðlimir SSF, sem eru yfir 20,
víðs vegar af landinu, stefna að því að halda sameiginlega söguhátíð
hér á landi sumarið 2008. Mér er ekki kunnugt um hver áherslan á
þessari hátíð verður, en ef hún verður eitthvað nálægt yfirlýstum
tilgangi samtakanna þá má gera ráð fyrir að hún verði a.m.k. á
tímabilið frá landnámi og fram um 1300 - en hvort áherslan verði á
víkinga, bardaga og blóðsúthellingar eða daglegt líf minna áberandi
miðaldafólks er alls óvíst. Ég gef mér þó að hún eigi að vera
á ÍSLENSKA sögu.
|
Betur má ef
duga skal...
Metnaðarleysi og mismunun
Hingað
til hefur lítið sem ekkert verið lagt upp úr því að hafa vandaða
og viðeigandi handverksmarkaði á hinum svo kölluðu miðaldahátíðum
hér á landi. Metnaður virðist enginn!
Auk
þess eru Íslendingar ávallt í miklum minnihluta meðal þátttakenda.
Heldur leiðinleg staðreynd það og ég er sannfærð um að hún komi til af
því að hátíðarhaldarar ætlast til þess að íslenskir handverksaðilar
komi endurgjaldslaust til þátttöku, á meðan erlendir aðilar fá kostnað
sinn endurgreiddan og jafnvel laun í vasann. Þessa mismunun þarf að
laga - og það fljótt ef á að takast að halda íslenskum endurvekjendum
inni í myndinni!
Mission
Impossible
Mín reynsla er sú, að flestir - ef ekki allir - íslenskir
hátíðarhaldarar séu haldnir sjálfs-eyðileggjandi ranghugmyndum um
að handverksaðilar græði stórlega á þátttöku í
miðaldahátíðum. Þeir telja, jú, að við getum gott
nok komið endurgjaldslaust til þátttöku... og gefið í skyn að við
ættum jafnvel fremur að þakka fyrir að fá að koma og setja upp
bása á hátíðum...
Þvert á ranghugmyndir hátíðarhaldara er reyndin sú að langmest
vinna íslenskra handverksaðila á miðaldahátíðum er fólgin
í miðlun sögu og sýningum á efni og aðferðum – en ekki
sölu eigin handverksmuna. Þeir sem virkilega kunna á sitt
handverk og vilja og geta miðlað því standa miklu fremur í
sýningum og miðlun en sölu muna.
Hvernig ætti sala að geta verið góð þegar handverksaðilar hafa
sárafáa muni framleidda og til sölu hverju sinni...!? Það
á aftur sínar skýringar.
Persónulega eyði ég t.d. ekki lengur miklum tíma frá annarri vinnu
til að undirbúa þátttöku og framleiða muni fyrir hátíðir, hvað
þá set fjármagn í hráefniskaup þegar ég get ekki stólað á að
hátíð sé það vel skipulögð og vönduð að fólk láti sér
detta í hug að versla á henni...
Nú, svo mætti benda á að aðal markhópurinn á hátíðum
eru börnin - og ekki koma þau með úttroðnar buddur á
staðinn.
Nei, auðvitað
vinnur maður frekar það sem gefur peninga, vinnuna sína, en reynir
að koma út með sem minnstum fjárhagslegum skaða eftir þátttöku
í miðaldahátíðum.
Gestir hátíðar fá sína skemmtun og fræðslu eftir sem áður, nú
og hátíðarhaldarar væntanlega hagnað af aðgangseyri gestanna - ef
þeir hafa vit á því sem þeir eru að gera...
Erlendir
þátttakendur eru mun duglegri en Íslendingar í sölu heldur en
miðlun af nokkru tagi. Tungumálaörðugleikar gætu verið hluti
skýringar... Einstaka erlendur þátttakandi miðlar þó fróðleik um
handverk sitt ef spurður, en flestir þegja þunnu hljóði og sitja
jafnvel súrir á svip á básum sínum. Ég kann ekki skýringu á
þessu gleðileysi.
Íslenskir handverksaðilar fara oft langar vegalengdir með allt sitt
hafurtask sem einu sýningargripi viðkomandi hátíðar og taka
jafnframt að sér að vera skemmtikraftar (eða í raun
sýningargripirnir sjálfir) án þess að fá svo mikið sem þakkir
fyrir það, hvað þá beinharða peninga.
Við þurfum að verða okkur úti um dýra búninga og fylgihluti,
jafnvel tjöld yfir höfuðið á okkur og sum hver útbúa líka
leikmynd í kringum handverk sitt. Flesta þessa hluti þarf að auki
að endurnýja með nokkurra ára millibili, enda forgengilegir.
Nú,
svo eru endurvekjendur á sumum stöðum á landinu skikkaðir í
"sjálfboðaliðastörf" af ýmsu tagi, utan sem innan tíma
hátíða! Ég hvet slíka "sjálfboðaliða" til að
stöðva þá þróun hið bráðasta og láta ekki bjóða sér aðra
eins fásinnu.
Það verður
spennandi að sjá hvort af hátíð SSF verður 2008 og þá hvort samtökin sjái
hag sinn og sóma í því að
fá íslenska handverksaðila til að vera með gegn gjaldi eður ei.
Kannski
það gerist bara með kjána eins og mig að svekkjast yfir fölskum
tónum og hægagangi mála í endurvakningu - eða gefast upp á þátttöku, eins og ég
er í raun að gera. Hvað um það, fórnarkostnaðurinn hefur
verið ærinn og ég loks að meðtaka að það mun seint borga sig fyrir
handverksfólk að taka þátt í endurvakningar-hátíðum hér á landi.
Gagngerar breytingar á stjórn og skipulagi eru trúlega ekki nóg, en
mér sýnist þurfa að koma til hugarfarsbreytingar og samtakamáttur
hjá endurvekjendum sjálfum ef egg eiga að klekjast út í stað þess
að verða fúlegg...........
Við eigum ekki að þurfa að leggja extra-vinnu á okkur eftir
hátíð til að geta rétt úr kútnum eftir þátttöku í
miðaldahátíðum. Við eigum heldur ekki að þurfa að gefa vinnu okkar eða færa
fórnir til að fá að vera með.
Krefjumst launa! Sameinumst um að skapa farveg sem er vænlegur
til framfara í þessari skemmtilegu sýslan.
(þessu
erindi er ekki lokið, ég bara nenni ekki lengur...)
|
Handverkshátíðin
á Hrafnagili
Dórothea
Jónsdóttir á www.listalind.is tók
að sér framkvæmdastjórn Handverkshátíðarinnar í Hrafnagili árið 2006 og
hefur síðan staðið fyrir gríðarlega miklum og góðum breytingum á henni.
Hún setti m.a. upp vinnusvæði í stærðar
tjaldi og bauð mér að vera með þar ásamt um 30 öðrum
handverksaðilum 2006 og aftur í ár, 2007, en þá vorum við
eitthvað færri. Öll vorum við að vinna á básum okkar og sýndum gestum
og gangandi vinnubrögð og svöruðum spurningum.
Ég er talsvert spennt fyrir að vera aftur með 2008, því stefnt er að því að
hafa þema sem mitt handverk passar sérlega vel inn í - miðaldir. Það verður spennandi að sjá hvort af þessu verður ef nýr
framkvæmdastjóri tekur við.
>>>
Fylgist með hver stefnan verður 2008
|
|
|
LJÓSMYNDIR
2007
Heimsókn í DUBLINIA
miðalda- og víkingasafnið í Dublin
2007
Heimsókn í Trinity College í
Dublin
til að skoða The Book of Kells
(myndataka ekki leyfð, en ég set í staðinn verk í sama stíl)
2007
Handverks- og
uppskeruhátíðin
í Hrafnagili,
Eyjafirði
2006
Handverks- og
uppskeruhátíðin
í Hrafnagili,
Eyjafirði
Leifshátíð í Dölunum
2005
Miðaldadagur á Gásum
við Eyjafjörð
Leifshátíð
í Dölunum
2004
Sólstöðuhátíðin
við Fjörukránna
í
Hafnarfirði
2003
Sólstöðuhátíðin
við Fjörukránna
í
Hafnarfirði
2002
Evrópska
miðaldahátíðin
í
Horsens, Danmörku
|