Ég er rétt að ljúka við að koma upp aðstöðu fyrir námskeið heima hjá mér og verð fljótlega með eftirfarandi námskeið í boði:

Örnámskeið

Myndhekl
Einnig kallað Tapestry-hekl, hart hekl eða tvíbandahekl.
Að því er ég kemst næst er uppruni þessa hekls í Afríku og/eða Suður Ameríku, en einnig nota Finnar það.
Mjög skemmtilegt hekl sem frábært er að nota í töskur, körfur, mottur, dúka, veggmyndir og fleira þar sem margra lita er þörf.

Einstaklingsmiðuð kennsla.

Skrautstafir
Er að setja saman efni fyrir örnámskeið í gerð skrautstafa úr Lombard, Uncial og Book of Kells.
Hægt er að gera mjög persónulegar og góðar gjafir úr einum einasta bókstaf...

Bókband
Einnig get ég boðið upp á stutt námskeið í miðalda-bókbandi. Magnað í litlar minnisbækur og gestabækur.

Lengri námskeið

Miðaldahandverk skrifara og lýsara
Letur & Lýsingar í boði fyrir litla hópa - hafið samband.

Yfirlit námskeiðs:
1. hluti:  Saga leturs og lýsinga (glærukynning)
2. hluti:  Efni skrifara og lýsara
3. hluti:  Áhöld skrifara og lýsara
4. hluti:  Aðferðir skrifara og lýsara

Ég var fyrst með þetta námskeið fyrir norðan 2007 og það tók þá 15 klukkustundir og var frekar stíft vinnunámskeið. Nú get ég boðið fólki að koma heim til mín í fína vinnuaðstöðu og hef því breytt uppsetningu námskeiðsins talsvert, jafnvel bútað það niður svo fólk fái færi á að æfa sig heima milli verka.

Farið er í uppsetningar verka - teikningar - gyllingar - málun - og frágang verka. Efni og áhöld útveguð. Þátttakendum er ráðlagt að koma með myndavél til að taka myndir af vinnsluferli sínu.

VAL: Saga skrifara og lýsara kynnt með Power-Point kynningu.

Sýnd efni og áhöld. Eftir undirbúning vinnuborðs, fara þátttakendur beint í að vinna myndverk með tilbúnum hráefnum. Fyrst er unnið á pappír, en svo er bókfellið tekið fram og verk unnið á það, m.a. með gyllingu. 
Markmiðið er að þátttakendur fái nægan grunn til að geta farið að vinna með bókfell, myndir, gull og liti út frá miðaldaaðferðum - og þá geri ég ráð fyrir að nemendur hafi góðan grunn að byggja á, eða einhverja reynslu af skrautritun, teikningum og málun.

L J Ó S M Y N D I R 

Miðaldahandverks-
námskeiðið
Letur & Lýsingar
Akureyri, 19.- 21.10.2007