Trinity College, Dublin
Þar fór ég á sýningu á The Book of Kells og mörgum fleiri handritum frá miðöldum - sem allir skrifarar og lýsarar ættu að fara að skoða.  

Í inngangi reyndist vera mjög vönduð minjagripaverslun! Nánast allt sem í henni er kemur sýningargripum safnsins við, beint eða óbeint. Flott! Fjöldi bóka og rita, DVD og CD diskar í boði og merkilega stórt svæði tekið undir minjagripi fyrir börn. Flest þar er hannað í greinilegum fræðslu- og kennslutilgangi. Úrvalið í heild vel valið í verslunina og mjög fjölbreytt. Í boði voru m.a.s. líka vandaðir handunnir munir og það út frá sama grunni, en frekar lítið pláss er ætlað handverki. Handunnir munir eru eðlilega dýrari vara. Miðaldasaga Íra er nánast áþreifanlegur grunnur á bak við úrvalið í versluninni. Fátt, ef nokkuð, í boði sem kemur málinu ekki við. Geri aðrir betur...

Christ Church, Dublin
Miðalda- og víkingasafnið DUBLINIA

Sýningin er, held ég, að langmestu leyti helguð tímabilinu frá ca. 12.öld, en víkingahlutinn er lítill og meira ætlaður yngstu skólabörnum en fullorðnum og þar er flest í tilgátuformi og með nútímasmíði úr krossviði eða álíka ómerkilegum viði. Sá hluti er aðeins nokkurra ára gamall skilst mér, en niðri í aðalsafninu, sem er mun eldra, gegnir allt öðru máli. Þar eru líka tilgátubúðir, básar og götur, en allt mun vandaðra. Ég gekk um í sæluvímu. Ég var yfir mig hrifin af því sem þar bar fyrir augu. Írar kunna svo sannarlega að vekja áhuga á sögu sinni. 

www.dublinia.ie/

Hér sést safnið utan frá í kirkjuportinu. Jarðhæðin er undir tilgátubúðirnar, 1. hæð undir sögu og fornmuni, 2. hæð undir tilgátubúðir frá tíma víkinga.

Starfsfólk tekur mjög vinalega á móti gestum í anddyrinu og er íklætt hvers-dagslegum miðaldabúningum. Kannski líka með þess tíma hárgreiðslur...? Ég hugsaði því miður ekki út í að taka mynd af þessu flotta pari.

Við gengum framhjá fjölda steindra glugga á leiðinni úr versluninni og yfir í sjálfa Christ Church. Ég var enn á ný gáttuð á fíngerðum línum. Hélt satt best að segja að hlutirnir hefðu verið grófgerðari. Enn á ný steingleymdi ég nýju myndavélinni.